നിന്നെ കാണാതായാല്
ഞാനീ മേഘത്തിനോട് ചോദിക്കും
അത് അടുത്ത മേഘത്തോട്
അങ്ങനെ കൈ മറിഞ്ഞ്
നിന്റെ വീടിന്റെ മുകളിലെ
അപ്പോള് പെയ്ത് തീരാന്
പോകുന്ന മേഘത്തിലെത്തും
നിന്റെ ജനലിലേക്ക് ചാഞ്ഞ
മരച്ചില്ലയോടത് ചോദിക്കും
നിന്നെ കണ്ടോയെന്ന്
ഇവിടെയുണ്ടെന്ന്
മുകളിലേക്ക് ഒരില പൊഴിച്ചാ
മരം പറയും
അടുത്ത മേഘത്തിലേക്ക്
തിരിച്ച് പറഞ്ഞത്
പെയ്യാന് തുടങ്ങും
ഇപ്പോള് മഴയോ എന്ന്
ജനലിലൂടെ നീ നോക്കും
പെയ്യാത്ത മഴയിലേക്ക്
കുട നീവര്ത്തി ഞാനും
No comments:
Post a Comment