Tuesday, September 11, 2018

വാന്‍ഗോഗ്

കാലിയായ  തീപ്പെട്ടിക്കൂട്
ഒഴിഞ്ഞൊരു പെട്ടകമാണ്
മുഴുവന്‍ ഉരച്ച് തീര്‍ത്തിട്ടും
കത്താതെ പോയ
തീയെ കുറിച്ചാണോര്‍ക്കുന്നത്
പച്ചയ്ക്ക് നില്‍ക്കുന്ന
മഴക്കാടിനെ കുറിച്ചാണ്
അകം ശൂന്യമായ
ഒന്നുലഞ്ഞപ്പോള്‍
മുങ്ങിപ്പോയ
കപ്പലിനെ കുറിച്ചും

മുറിച്ച് കൊടുത്തതാണ്
ഒന്നുമറിയാതെ
ആ പൊതി തുറക്കുമ്പോള്‍
അവരെത്ര മുറിഞ്ഞിരിക്കും

മഞ്ഞച്ച ഗോതമ്പ് പാടത്ത്
നിന്നാകാശത്തേക്ക്
നക്ഷത്രങ്ങളെ
വാരി എറിയുന്ന രാത്രി

ഒരാള്‍പൊക്കമുള്ള
കണ്ണാടിയില്‍
ഇലകളില്ലാത്ത ഒരു മരം
ചില്ലക്കൊമ്പിലോരോ
ചുവന്ന പൂവ്

അല്ല നമ്മളെന്താണ്
പറഞ്ഞ് വന്നത്
ആ.. അത് തന്നെ
മുറിഞ്ഞൊരു ചെവി കൊണ്ട്
ഒരാളെ തിരിച്ചറിയാനാവുമോ
എന്ന്..

Monday, September 10, 2018

ഒരാളിലെ മറ്റൊരാള്‍ 

1.
പുറപ്പെട്ടു പോയ ഒരാള്‍ 
അയാളെ അന്വേഷിക്കുന്ന മറ്റൊരാള്‍ 
അയാള്‍ ചെന്നേക്കാനിടയുള്ള
എല്ലായിടത്തും തിരക്കുന്നു
അയാളോ എങ്ങോട്ടെന്നു പോലും 
ഉറപ്പില്ലാത്ത ഒരു തീവണ്ടിയിലെ
ജനറല്‍ കമ്പാര്‍ട്ട്മെന്റില്‍ 
തിരക്കിലുടുങ്ങി നില്‍ക്കുന്നു

ആ തിരക്കിലും അയാള്‍ 
മുറിച്ച വാലിനെ നോക്കി
ഇരിക്കുന്ന ഒരു പല്ലിയെ
കാണുന്നു, പിടയുന്നതും 
പിന്നെ അനക്കമറ്റതും കാണുന്നു

പൊഴിച്ചതിനു ശേഷം 
ഇതാരുടെ ഉടുപ്പെന്ന
അത്രയും ആശ്ചര്യത്തോടെ
നോക്കുന്നൊരു വരയന്‍ പാമ്പ്
അയാളുടെ ഉള്ളില്‍ 
പിടഞ്ഞു ചാടുന്നു
മഞ്ഞളും, കരിയും
ചേര്‍ന്ന ഗ്രാഫിറ്റി 
ഉടലില്‍ വരയുന്നു

അയാളെ തിരക്കുന്ന
മറ്റൊരാള്‍ അപ്പോഴും 
അയാളെ തിരക്കുന്നു
ഓഫ് ചെയ്ത ഫോണിലേക്ക്
തുടര്‍ച്ചയായി വിളിക്കുന്നു

അവസാന സ്റ്റേഷന്‍ എത്തും മുന്നേ
വേഗത കുറച്ച തീവണ്ടിയില്‍ 
നിന്ന് ചാടിയിറങ്ങിയ അയാളോ, 
ഒരൊറ്റ വരമ്പിലൂടെ 
കൈകള്‍ ചിറകുകളാക്കി
കാലുകള്‍ തൊട്ടു, തൊട്ടില്ല
എന്ന പോലെ പാഞ്ഞ് പോയി
അയാളുടെ പിന്നാലെ
കാറ്റ് പറന്നു
കാറ്റിന്റെ കയ്യില്‍ 
ഒരോല കാറ്റാടി
ഉണ്ടായിരുന്നു

2. 

ഒരാള്‍കൂട്ടത്തിലേക്ക്
രക്ഷപ്പെടാന്‍ ഓടിക്കയറിയ
ഓര്‍മ്മയെ ഒരാള്‍ 
അതിന്റെ ഓര്‍മ്മയിലെ
പേരു വിളിക്കുന്നു
ചലിക്കാനാവാതെ 
നിന്നു പോകുന്ന
അതിനെ പിന്തുടരുന്നയാള്‍ 
വെടി വച്ചിടുന്നു. എളുപ്പത്തില്‍ 

വേനലാണോ..മഴയുണ്ടോ?
രണ്ടായിരത്തി പതിനെട്ടിലെ പോലെ
പിന്നൊരു പ്രളയം ഉണ്ടായോ ?
നമ്മളിപ്പോള്‍ എവിടെയാണ്
എനിക്ക് അറുപത്തി അഞ്ചും നിനക്ക്
അമ്പതും ആയോ !

Sunday, September 9, 2018

അറിയാമോ

അറിയാമോ
വാക്കുകൾ കൊണ്ടുള്ള
മുറിവുണക്കാൻ പറ്റുന്ന മരുന്നുണ്ട്.
പനി പൊള്ളലിൽ പുരട്ടുന്ന 
തണുത്ത കൈവിരൽ തൈലമുണ്ട്
മിണ്ടാതിരിക്കുമ്പോൾ
മിണ്ടാനുള്ള ഭാഷയുണ്ട്.
കലാഹിക്കുമ്പോൾ മാത്രം
ഓർത്തെടുക്കുന്നു
 ഓർമ്മയുടെ കുപ്പി ചില്ലുണ്ട്.
ഒരാളോട് അത്രയും ഇഷ്ടമാണെന്ന്
പറയാൻ വേഗം
കൂടുന്ന മിടിപ്പുകൾ ഉണ്ട്
രാതിയാണ്..
നിന്നോട് മിണ്ടാതിരിക്കുന്ന
ഇടവേളകളിൽ ഞാനിറങ്ങി
 ഒരൊറ്റ നടത്ത വച്ച് കൊടുക്കും..
ആനന്ദം ആഴം തുടങ്ങിയ
മൂന്ന് നാല് വാക്കുകളുണ്ട്.
ഇടം കൈയ്യിൽ അമർത്തി നുള്ളുന്ന,
ഒരാൾ പഠിപ്പിച്ചത്..
എഴുതുന്ന എല്ലാ വാക്കുകളും
അവളെ കുറിച്ചാണ്..

Thursday, September 6, 2018

നമ്മൾ

ഞാൻ അന്ധൻ..
നിന്നെ ചുംബിക്കുന്നു..
മുലക്കണ്ണിനു ചുറ്റുമൊരു
കാട് പൂക്കുന്നത് അറിയുന്നു..
എനിക്ക് മാത്രമറിയുന്ന
ഭാഷയിൽ വിരൽ തുമ്പ് വായിക്കുന്നു
ഹൃദയ ഭിത്തിയിൽ വന്നുമുട്ടുന്നു
 ഒരു ജല മൽസ്യം..
എപ്പോൾ വേണമെങ്കിലും
 പെയ്തേക്കാവുന്ന
 മഴയിലേക്ക് സാകൂതം
മഴ പാറ്റകൾ നമ്മൾ..

മുറിഞ്ഞവര്‍

നീയെന്റെ സമുദ്രമാണ് 
അതു കൊണ്ട് തന്നെ
നിനക്കു മുന്നേ ഓര്‍മ്മകള്‍ 
ഉണ്ടായിരുന്നില്ല
ചൂണ്ടക്കൊളുത്തില്‍ നിന്ന് 
കുതറിയ മീനുകള്‍ 
വായ് മുറിഞ്ഞവര്‍ 
ജലത്തിലെ 
ഒരിക്കലുമുണങ്ങാത്ത
മുറിവുള്ളവര്‍ 

പ്രണയം തീവ്രവാദവും 
പ്രണയികള്‍ തീവ്രവാദികളുമാണ്
അവര്‍ക്കുള്ള ലഘുലേഘകള്‍ 
അച്ചടിച്ച് വിതരണം ചെയ്യുന്ന
ഒളിപ്പോരാളികളില്‍ ഒരാളാണ്
നീയിതുമാത്രം ചെയ്യുക, 
മൂര്‍ച്ചയേറ്റിയൊരു 
മിനുക്കക്കത്തിക്ക്
ആഴമളക്കാന്‍ 
ഉടലില്‍ ഒരിടം തരിക

പ്രാവുകള്‍ നമ്മള്‍ 

പുറത്ത് നിന്നാല്‍
അകം കാണാന്‍ കഴിയാത്ത
ജനലാണ്‌ നാലാം നിലയിലെ ഓഫീസില്‍
ഒന്നു കൈയ്യെത്തിച്ചാല്‍ തൊടാവുന്ന
അത്രയടുത്ത് വന്നിരിക്കും
രണ്ട് പ്രാവുകള്‍
സ്നേഹമായിരിക്കണം
കിന്നാരം പറയുന്നുണ്ട്
കൂട് കെട്ടാനുള്ള
എന്തോ ആയിരിക്കണം
ഇടക്ക് കൊത്തി വരുന്നത് കാണാം
ഇടയ്ക്ക് ചിറകൊതുക്കി ഇരിക്കും
കുറുകുന്നത് അവ്യക്തമായെങ്കിലും
ഇപ്പുറം കേള്‍ക്കാം
ഇപ്പോ പിടിക്കുമെന്ന മട്ടില്‍ ഞാന്‍
കൈ കൊണ്ട് ചെല്ലാറുണ്ട്
കാണാത്തതില്‍ ആവണം പറന്ന് പോവാറില്ല
ഉള്ള്‌ കാണാത്തതില്‍ ആവണം

പരസ്പരം അകം കണ്ടിരുന്നെങ്കില്‍
നമ്മളില്‍ പലരും പറന്ന് പോവില്ലേ
എന്നോര്‍ത്തു
പോവാതിരിക്കുമെന്നും ..

Wednesday, September 5, 2018

ഏകകോശ ജീവികള്‍

ഒരു നീളന്‍ തൂവാല കൊണ്ട്
ഞാനെന്റെ കണ്ണു കെട്ടുന്നു
ഒരു മണല്‍ ഘടികാരത്തിന്റെ
ചോട്ടില്‍ നില്‍ക്കുന്നു
കണ്ണറിയാത്തവന്റെ
കേള്‍വിയില്‍
ഊര്‍ന്നിറങ്ങുന്ന
മണല്‍ത്തരികള്‍
വേരുകളായി നീളുന്നു
വീഴുമ്പോള്‍ പൊടുന്നനെ
ഏതൊരോര്‍മ്മയിലാവണം
അത് നിന്ന് പോയത്

ഉള്ളിലെ തടാകത്തില്‍
വെള്ളം കുടിക്കാനെത്തിയ
മാന്‍ കുട്ടി
ഏതോ അമര്‍ത്തിയ
കാലടിയൊച്ചയില്‍
മുഖമുയര്‍ത്തി
ചെവിയോര്‍ത്ത്
നിശ്ചലം നില്‍ക്കും പോലെ
കൊല്ലപ്പെടും മുന്നേയുള്ള
ഒരു നിമിഷം
ചിതറിയ ഒറ്റ നോട്ടത്താല്‍
അവസാന വാക്കുച്ചരിക്കുന്നു
വ്യര്‍ത്ഥ പ്രാര്‍ത്ഥന

ഞാനും നീയും രണ്ടിടങ്ങളിലിരുന്ന്
ഓര്‍മ്മകളെ പച്ച കുത്തുന്നു
പാതി മുഖം മറച്ച തൊപ്പികള്‍
മടക്കിലൊളിപ്പിച്ച പാദസരം
എത്ര പിടിച്ചാലുമൊതുങ്ങാത്ത
വഴുക്കുള്ള മീന്‍
അതിന്റെ തുറ കണ്ണ്

ഉച്ച തിരിഞ്ഞു
എന്നിട്ടും വെയിലാറിയിട്ടില്ല
ആരോ ഒരാളിന്റെ
കത്തുമായി വരുന്ന
പോസ്റ്റ്മാനെ നോക്കിയിരിക്കുന്നു
നിലച്ച നിമിഷം തൊട്ട്
തുടര്‍ന്ന് ഒഴുകുന്ന വരെയുള്ള
ജീവിതത്തെ പകര്‍ത്തിയെഴുതിയതിന്റെ
ഒരു ശരിപ്പകര്‍പ്പ്
കുനുകുനാ എഴുതിയത്

എത്ര തവണയാണ്
നീയത് തിരിച്ചും മറിച്ചും
വയ്‌ക്കുന്നത്
താനേ തിരിയുന്ന
ജലഘടികാരങ്ങളുണ്ടാവുമോ

പക്ഷേ നമ്മള്‍ ഏകകോശ ജീവികള്‍
വരിവരിയായി കടന്ന് പോകുന്നവര്‍
ഒഴിയുകയാണെന്നോ
നിറയുകയാണെന്നോ
തീര്‍ച്ചയില്ലാത്തവര്‍

Tuesday, September 4, 2018

തോറ്റു പോയവരുടെ കഥ കൂടെ കേള്‍ക്കുമോ

പ്രളയം കഴിഞ്ഞുള്ള
വരള്‍ച്ച കാലമാണ്
എന്നാലും 
ഇന്നു രാവിലെ മുതല്‍ 
കാലാവസ്ഥ പ്രവചനത്തിനു
വിപരീതമായി 
മഴ പെയ്യുന്നുണ്ട് ഇവിടെ

ഉരുള്‍ പൊട്ടുമെന്നൊക്കെ 
പറഞ്ഞു മെസേജുകള്‍ 
വരുന്നുണ്ട് പിന്നെയും 
നിന്റെ അടയാളം പേറുന്ന
നിരവധി സാധനങ്ങളുണ്ട് 
ഒരീച്ച പറന്ന് നടക്കുന്നു
ശവം മണക്കുന്നുണ്ടാവണമതിനു

പകര്‍ച്ചപ്പനി പോലെ 
എന്തോ ഉള്ള്‌
വിറപ്പിക്കുന്നുണ്ട് 
തുറന്ന് നോക്കാന്‍ 
പേടിച്ച് വച്ചിരിക്കുന്ന
പൊട്ടിക്കാത്ത കത്ത്
പോലെ ഞാനിരിക്കുന്നു

ഞാന്‍ സങ്കടപെട്ടിരിക്കുകയാണ്
എപ്പോഴും മാറി വരുന്ന മൂഡ് ആണ്
ആര്‍ക്കുമെന്ന് ഇഷ്ടമില്ലേ 
എന്നൊക്കെയാണ്
കരുതുന്നത്
പക്ഷേ എനിക്ക് ഇന്നെ ഉമ്മ വക്കണം 
നീ മുഖം അടുപ്പിക്കുമ്പോള്‍,  
കൊത്ത് കൂടാന്‍ വരുമ്പോള്‍,  
ഒന്നിനും സമ്മതിക്കാതെ 
നിന്നെയും നീ ഒളിപ്പിക്കുന്ന 
എല്ലാറ്റിനേയും കടിച്ചു പറിക്കണം 
നിന്റെ പ്രാവുകളോടു കുറുകണം 
നിനക്കിതൊന്നും മനസിലാവുന്നില്ലെങ്കില്‍ 
ഒരു ദ്വിഭാഷിയെ കൂട്ടുമോ
പോട്ടെ ഇതൊന്നുമല്ലെങ്കിലും 
നിന്റെ നേര്‍ത്ത കൈ തണ്ടിലെ
രോമങ്ങളോട് ചോദിക്ക്
കുഞ്ഞി കുഞ്ഞി മറുകിനോടും 

എപ്പോഴും കടത്തില്‍ ആയ ഒരാള്‍ 
നാളെ തരാം എന്ന 
കള്ള വാക്കില്‍ മേടിക്കുന്ന
കടമാണ്

മരിച്ചിട്ടുണ്ട്, അറിയാം 
എന്നാലും അല്‍പ നേരം കൂടെ
ഒരിത്തിരി നേരം കൂടെ
നിന്നോട് സംസാരിക്കണം 
വഴക്കിടണം 
പിന്നീട് ചോര പൊടിയുമെങ്കിലും 
വഴക്കിട്ടതിന്റെ വാശിയില്‍ 
മരിച്ച് പോവണമെനിക്ക്

അല്ല ഇതൊന്നും നീ
ഓര്‍ക്കണമെന്ന് പറയുന്നതല്ല
ഒരല്പം സ്നേഹത്തോടെ 
എന്നെ ഓർമ്മിക്കുമോ
ഞാനെന്റെ ഓർമ്മയിൽ
എവിടെയും പോവാതെ നിന്നെ  
വച്ചിരിക്കുന്നതു പോലെ.

നമ്മുടെ മീന്‍ 
അതിന്റെ നീല ഞൊറികള്‍ 
കൊണ്ട്  നീന്തുന്നു
നിന്റെ കൈവെള്ളയില്‍,  
ജലത്തില്‍ 

മടുക്കും വരെ നമുക്ക് മിണ്ടാതിരിക്കാം

 1. തണുത്തുറഞ്ഞ കടലില്‍  പൊങ്ങിക്കിടക്കുന്ന നഗരമായിരുന്നത് വര്ഷം മുഴുവനും എന്നേക്കുമെന്നേ ക്കും  അതങ്ങനെ കിടന്നു ചെവിയോര്‍ത്താല്‍ കേള്‍ക്കാവ...