കാലിയായ തീപ്പെട്ടിക്കൂട്
ഒഴിഞ്ഞൊരു പെട്ടകമാണ്
മുഴുവന് ഉരച്ച് തീര്ത്തിട്ടും
കത്താതെ പോയ
തീയെ കുറിച്ചാണോര്ക്കുന്നത്
പച്ചയ്ക്ക് നില്ക്കുന്ന
മഴക്കാടിനെ കുറിച്ചാണ്
അകം ശൂന്യമായ
ഒന്നുലഞ്ഞപ്പോള്
മുങ്ങിപ്പോയ
കപ്പലിനെ കുറിച്ചും
മുറിച്ച് കൊടുത്തതാണ്
ഒന്നുമറിയാതെ
ആ പൊതി തുറക്കുമ്പോള്
അവരെത്ര മുറിഞ്ഞിരിക്കും
മഞ്ഞച്ച ഗോതമ്പ് പാടത്ത്
നിന്നാകാശത്തേക്ക്
നക്ഷത്രങ്ങളെ
വാരി എറിയുന്ന രാത്രി
ഒരാള്പൊക്കമുള്ള
കണ്ണാടിയില്
ഇലകളില്ലാത്ത ഒരു മരം
ചില്ലക്കൊമ്പിലോരോ
ചുവന്ന പൂവ്
അല്ല നമ്മളെന്താണ്
പറഞ്ഞ് വന്നത്
ആ.. അത് തന്നെ
മുറിഞ്ഞൊരു ചെവി കൊണ്ട്
ഒരാളെ തിരിച്ചറിയാനാവുമോ
എന്ന്..
No comments:
Post a Comment