Sunday, May 26, 2019

അല്ല. അതേയുള്ളൂ!!

കല്ലറയും പൂക്കളും
ജനിച്ചതും മരിച്ചതുമെഴുതിയ
ഫലകവും ,
മാര്‍ബിളിന്റെ മിനുക്കവും
നമുക്ക് പറഞ്ഞിട്ടില്ലടോ
ഒരു കണക്കിലും പെടാത്ത
എല്ലാ പീനല്‍ കോഡിലും
ശിക്ഷക്ക് സാധ്യതയുള്ള
നമ്മുടെ പ്രണയത്തിനു
ഏതെങ്കിലുമൊരു
തരിശു മലയിലെ
തെമ്മാടിക്കുഴി മതി

Sunday, May 5, 2019

വെയില്‍ വരുന്നു മഴ വരുന്നു

നിന്റെ വിരല്‍ തുമ്പ്
തിരക്കുള്ള റോഡില്‍
ഗിയര്‍ അപ്പോഴപ്പോള്‍
മാറ്റുന്ന എന്റെ വിരലിനെ
തൊടുന്നു
എനിക്ക് നിന്നെ തൊടാനല്ല
എല്ലാ എല്ലും നുറുങ്ങും പോലെ
കെട്ടി പിടിക്കാനാണ്
തോന്നുന്നത്

നിന്റെ മൂക്ക് ഉണ്ട ആണെന്ന്
നീ പറയാറില്ലേ
സത്യത്തില്‍ ഞാനെപ്പൊഴും
ഓര്‍ക്കാറുണ്ട്
അതൊരു കിളി മൂക്ക് ആയിരുന്നെങ്കില്‍
എത്ര ബോറായേനെ
മറുകില്ലാത്ത മുഖം
ആ തെണ്ടി സ്വഭാവമില്ലാത്ത നീ
ശ്ശേയ്
ഒരൊറ്റ ക്ളിക്കില്‍ ട്രാഷില്‍ പോയേനെ

നിന്നെ എത്ര നേരമായ് വിളിക്കുന്നു
എടുക്കാത്തതെന്ത്
എവിടെയാണ്
എനിക്ക് ഊഹിക്കാന്‍ വയ്യ
നിനക്കറിയാല്ലൊ എന്റെ
ഊഹങ്ങള്‍ പോകുന്ന വഴി
എന്റെ നെഞ്ചു വേദനകള്‍
പക്ഷെ തോറ്റു കൊടുക്കാതെ പോരാടും
ചുമ്മാ ഒരു ഡൈനാമിറ്റ് വച്ച് പൊട്ടിക്കും
മുറിവേല്‍ക്കും
പറഞ്ഞില്ലെങ്കിലും പറഞ്ഞാലും
മറ്റൊന്നും പോലെയല്ല
പ്രണയത്തിലും മരണത്തിലും
നമ്മളെത്ര അരക്ഷിതരാണ്
എളുപ്പമെത്താനുള്ള
കുറുക്കു വഴികള്‍
നഷ്ടപ്പെടുന്ന സമുദ്രങ്ങള്‍
എത്രയാണ്
എത്ര വെള്ള പേജുകളാണ്

ഒരു കയറ്റത്തില്‍ ആളൊഴിഞ്ഞപ്പോള്‍
നിന്നെ ഉമ്മ വച്ചതോര്‍മ്മയുണ്ട്
ഉച്ച കഴിഞ്ഞ് വിയര്‍പ്പില്‍
ഉപ്പില്‍ എന്നാല്‍ ആഴത്തില്‍
എനിക്കത്ര ഇഷ്ടമാണേ
എന്ന ഉറപ്പില്‍
വണ്ടി എവിടെയെങ്കിലും
പോയി ഇടിക്കട്ടെ എന്ന തോന്നലില്‍
കണ്ണടച്ച് ഉമ്മ വച്ചത്
മതിയാവാഞ്ഞിട്ട്
അമര്‍ത്തി കടിച്ചത്
എന്നോ ഒരു താഴവരയില്‍
നില്‍ക്കുമ്പോള്‍
മഞ്ഞ് കടന്ന് പോയതോര്‍മ്മയുണ്ട്
തൊട്ട് തൊട്ട്
ഹാ... ഉമ്മ പോലെ
ഒരു മുളം കാട് അതിന്റെ
പാട്ടിന്റെ വോള്യം  കൂട്ടുന്നു
ശീതകാലം വരുന്നു
ഞാനിവിടെ മുട്ടു കുത്തി
നില്‍ക്കുന്നു
എന്തിന്നെന്ന് നീ ചോദിക്കില്ല
മറ്റാരു ചോദിച്ചാലുമെന്റെ
പ്രണയമേ

കാലമേറെ കഴിഞ്ഞിട്ടുണ്ട്
കണ്ടിട്ടേറെയായി
ഇനി കാണുമ്പോഴെന്ത് പറയുമെന്നറിയില്ല
പക്ഷേ.. പക്ഷേ
എന്റെ ഹൃദയത്തേക്കാള്‍ പഴക്കമുള്ള
ഓര്‍മ്മകളേക്കാള്‍ ഓര്‍മ്മയുള്ള നീയേ
നിന്റെ വിരല്‍ തണുപ്പേ
ഒന്നിനും പകരമാവാത്ത നീയേ
ഇപ്പോള്‍ മരിച്ചോ..
പകരം നിന്നെയൊന്ന് തൊടാമെന്ന്
ഒരു കരുണയും ഇല്ലാത്ത
ദൈവം കഴുവേറി പറഞ്ഞാല്‍
രണ്ടാമതൊന്ന് പോലും
ആലോചിക്കാന്‍ ഇട തരാത്തവളേ
വെയില്‍ വരുന്നു
മഴ വരുന്നു
നീയെനിക്കൊരു ചിറക് കെട്ടി താ
മരിക്കുവോളം പറക്കാന്‍
ശലഭമെന്ന് വിളിച്ചോളൂ

Saturday, May 4, 2019

നീ

ഒരു ക്ലോക്കിനുള്ളില്‍ പെട്ട് പോവുകയും
സമയാസമയം കൂവേണ്ടി വരികയും
ചെയ്യേണ്ടി വരുന്ന ഒരു കിളിയാണ്
വെറുമൊരു കിളി
നട്ടുച്ചകളില്‍ ജനലിലേക്ക് നീളുന്ന
ചുവന്ന പൂക്കളില്‍ തട്ടി വീഴുന്ന
വെയിലിനെ കാണുന്നുണ്ട്
പൂക്കാലമാണോ .. വേനലാണൊ
എന്നൊക്കെയോര്‍ത്ത്
കറുത്ത ചരടില്‍ കോര്‍ത്തൊരു
കുരിശ് കാറ്റിലാടുന്നുണ്ട്
നിന്റെ വീട്ടിലേക്ക് കടക്കാന്‍
നീയെനിക്കൊരു കിളിവാതില്‍
പണിയുക
ചിറകൊതൊക്കി അകത്ത് വരുമ്പൊള്‍
എളുപ്പമാണ്
അധികമൊന്നും മിണ്ടാതെ
നനഞ്ഞ ചുണ്ടാല്‍ അമര്‍ത്തിയൊന്ന്
ഉമ്മ വയ്ക്കുക
ആ ഒരൊറ്റ ഉമ്മയില്‍ നിലച്ച് പോണം ശ്വാസം
ഇനിയൊരിക്കലും തിരിച്ച് വരാതെ
അവസാനത്തെ ഓര്‍മ്മ.നീ








Saturday, April 27, 2019

പതുക്കെ മാഞ്ഞു പോയി..

ഒരേ റാട്ടില്‍ നിന്ന്
പിരിഞ്ഞെത്തുന്നു
വെറുപ്പും പ്രണയവും.
കൊല്ലാതെ കൊല്ലുന്ന
കൊലക്കയര്‍

ഒരു വേള

നമുക്ക് ഓടിത്തൊട്ട് 
കളിച്ചാലോ
തൊടാന്‍ നീയും 
തൊടാതിരിക്കാന്‍ ഞാനും 
നമുക്കോടിയോടിയറ്റം പോകാം 
അതി രാവിലെ അഞ്ച് മണിയുടെ
മങ്ങികത്തുന്ന ഒരാകാശമുണ്ട്
മലക്കുകള്‍ ഈയാപാറ്റാകളെ
പോലെ പാറി നടക്കും 
മടി പിടിച്ച ഒരിമ്പിരി കുഞ്ഞ്
നേഴ്‌സറിയിലേക്കെന്ന പോലെ
വെയിലിന്റെ വരവില്‍ 
ഓടി പോകുമവര്‍ 

നീ കടമായി ചോദിച്ച
കുഞ്ഞ് പര്‍പ്പിള്‍ പൂ
വിരിഞ്ഞ കള്ളിച്ചെടി
ഞാനെടുത്ത് വച്ചിട്ടുണ്ട്
ആദ്യ വെട്ടം വീഴുന്ന
നമ്മുടെയാ ജനലിന്റെ
ഇടത്തേയറ്റത്ത് തന്നെ 
വക്കണമത്


മുഷിഞ്ഞിരിക്കുന്ന
ചില മധ്യാഹ്നങ്ങളില്‍ 
നീ കണ്ടിട്ടില്ലേ
കേട്ടിട്ടില്ലേ
നമ്മുടെയുള്ളില്‍ 
എന്തൊരു കാറ്റാണ്
ഉന്മാദം മൂത്ത് മുളകളൊക്കെ
ചീറുന്നത് കേള്‍ക്കുന്നുണ്ടോ
ഒരു വേള ചീന്തിപൊട്ടുമെന്ന്
തോന്നും ..
ഒടുക്കത്തെ ഒരു ചിരി വാര്‍ന്ന്
കരച്ചിലാവും പോലെ 



അതെ!

നിന്നിലേക്കെത്തുന്ന സന്തോഷം നിറച്ച
എല്ലാ പാണ്ടി ലോറിയും എന്റെ 
പാലത്തിലൂടെ കടന്ന് പോണം 
നിന്റെ എല്ലാ സന്തോഷവുമ്
എന്നിലൂടെ ആവണം 
നിന്റെ ചിരികള്‍ ആരവങ്ങള്‍ ഉന്മാദങ്ങള്‍ 
പിണക്കങ്ങള്‍ കുശുമ്പുകള്‍ അസൂയ 
അങ്ങനെ നീയുമായി ബന്ധപ്പെട്ട
എല്ലാ ക്രയവിക്രയങ്ങളും 
എല്ലാ ചര്‍ച്ചകളും 
ഉഭയ കക്ഷി സമാധാനങ്ങളും 
വെടി നിര്‍ത്തലുകളും 
എല്ലാം എന്നിലൂടെ കടന്ന് പോകണം 

ഹാ.. എന്തൊ സ്വാര്‍ത്ഥന്‍ എന്നല്ലേ,,
അതേ.. സ്വാര്‍ത്ഥന്‍ ആണ്
കുശുമ്പന്‍ ആണ്
വഴക്കാളി ആണ്
നീ കരുതുന്നുണ്ടാവും 
ഇങ്ങേര്‍ക്ക് നാണമാവില്ലേ എന്ന്
ഇല്ല നാണമില്ല
കത്തിക്കൊണ്ടിരിക്കുന്ന 
ഒരു കെട്ടിടത്തില്‍ നീ മാത്രം 'രക്ഷപെടണേ
ബാക്കി എല്ലാരും ചത്തു പോയാലും 
എന്നോര്‍ക്കുന്ന
എല്ലാ തീപ്പെട്ടി കൊള്ളിയും 
കത്തി പോയാലും നീ മാത്രം കത്തല്ലേ എന്നോര്‍ക്കുന്ന
അത്ര പിശുക്കന്‍ അത്ര സ്വാര്‍ത്ഥന്‍ 
ആരു എന്തുടുപ്പിട്ടാലും പ്രശ്നമില്ല
നീ സ്ലീവ്‌ലസ് ഇടരുത് എന്ന് ആഗ്രഹിക്കുന്നില്ലേ
അത്രേ ഉള്ളൂ
ആരു വേണേല്‍ വെള്ളമടിച്ചോട്ടേ
നീ വേണ്ട
എന്ന് ആഗ്രഹിക്കുന്നില്ലേ
അത്രേ ഉള്ളൂ
എത്ര വെയിലാണെങ്കിലും നീ പോകുന്ന 
വഴി നിറയെ തണല്‍ മരങ്ങള്‍ 
വേണമെന്നൊക്കെ ഓര്‍ക്കുന്ന
ക്ലീഷേ , അല്ല അത്രയേ ഉള്ളൂ
ഒരു വീഡീയോ കോളില്‍ 
ലൈറ്റ് കെടുത്തിയ ശേഷവും 
നീ മിണ്ടൂമ്പോള്‍ 
സദാ പിടഞ്ഞു കൊണ്ടിരിക്കുന്ന
കണ്ണുകള്‍ കാണണമെന്ന
മിണ്ടാന്‍ വെമ്പുന്ന ചുണ്ടുകളൊന്ന്
കാണണമെന്ന അത്യാര്‍ത്തിയില്ലേ
അത്രയേ ഉള്ളൂ

സത്യത്തില്‍ ഈ കാറ്റില്ലേ കാറ്റ്
അത് ഉണക്കാനിട്ടിരിക്കുന്ന
തുണീകളോട് ചെയ്യാന്‍ 
പോകുന്നതെന്തെന്ന് 
മുന്‍ കൂട്ടി അറിയാന്‍ പറ്റോ
ചെലപ്പോ പറത്തി കൊണ്ട് പോകാം 
ഉണക്കാം , കൂട്ടി കുഴക്കാം 
പ്രണയം സാധുവായ എന്നോട്
ചെയ്യുന്നതെന്ത് കാറ്റേ,
കാറ്റായ നീയേ

ഉറങ്ങാത്തവര്‍ക്ക് മാത്രം 
മനസിലാവുന്ന ഭാഷയുണ്ട്
ചില കരച്ചിലുകള്‍ 
അമര്‍ത്തിയ കാലൊച്ചകള്‍ 
ദൈവം വരുന്ന സമയം 
കുഞ്ഞീ
നിന്നെ അത്രെം ഇഷ്ടമാണെന്ന്
എനിക്കത്രയും ജീവനാണെന്ന്
നിനക്കറിയാവുന്ന ഭാഷയില്‍ 
പരിഭാഷപ്പെടുത്തി കൊടുത്തു
വിട്ടിട്ടുണ്ട്
നിനക്ക് വായിക്കാന്‍ പറ്റുന്നതിലും 
അധികം വരികള്‍ കാണും 
വായിക്കണം 
ഏതോ ബോംബ് ഉണ്ടാക്കുന്ന 
ഒളി സ്ഥലത്ത് പണിയെടുക്കുന്നവനാണ്
എപ്പോള്‍ വേണമെങ്കിലും 
കൈ തകര്‍ന്ന് പോകാവുന്നവനാണ്
അപ്പോഴും നിന്റെ വിരലിന്റെ
തണുപ്പ് സൂക്ഷിക്കുന്നവനാണ്
"മ്മ" എന്നൊരു വാക്കില്‍ 
ഒരുമ്മയുടെ ശ്വാസവും 
അമര്‍ത്തിപ്പിടിക്കലും 
കെട്ടിപ്പിടിക്കലും ..
ഹോ ! പ്രണയമേ
ജീവനേ 
ജലമേ
ആകാശമേ
വാക്കേ
ആഴമേ
മുറിവേ
നീയേ
നീയില്ലാതെ/ നീയല്ലാതെ
ഒന്നുമില്ലെന്ന്
പറയാന്‍ ഒരു ഭാഷ വേണം 
അല്ലെങ്കിലൊരു വാക്ക് വേണം 
ആ ഒരു വാക്ക് പറയുമ്പൊള്‍ 
ഞാനോ നീയോ ഒരാള്‍ 
മരിച്ചോണം 
പിന്നെ ഒരാളേ പാടുള്ളൂ
അയാളിങ്ങനെ 
മരിച്ച് മരിച്ച് മരിച്ച് പോവണം 
നീയില്ലാതെ ഞാനെങ്ങനെ 
ചിരിക്കുമെന്നോര്‍ത്ത്
കരഞ്ഞ കരഞ്ഞ്
മരിച്ചോണം 


എന്തൊരു സ്വാര്‍ത്ഥന്‍ എന്നല്ലേ...
അതെ!

ആധി

ഇരുളും വരെയുള്ള ഡ്രൈവിംഗ്,
നമ്മള്‍ വെയിലില്‍ നമ്മളെ പുഴുങ്ങുന്നു
വിയര്‍ത്തുമ്മ വയ്ക്കുന്നു
നമ്മുടെ ഇടയില്‍ വാക്കുകള്‍ 
കെട്ടഴിച്ചു വിട്ട ആട്ടിന്‍ കുഞ്ഞുങ്ങളെ 
പോലെ ആവഴിയീവഴി പായുന്നു
ചിറകൊട്ടിച്ച പക്ഷികള്‍ നമ്മള്‍ 
പറക്കുന്നു നേരേയും ചെരിഞ്ഞും 
നമ്മളിരിക്കുന്ന പുളിമാവ്
ഓടിക്കയറുന്ന പുളിയനുറുമ്പുകള്‍ 
ചില്ലയുണ്ടാവുമെന്നുറപ്പില്ലാത്ത
അടുത്ത വരവ്
കാണുമ്പോഴെല്ലാം 
നമ്മളുമ്മ വയ്ക്കുമെങ്കില്‍ 
ജീവനേ മരണത്തിനു മുന്ന്നേ
നമ്മളെത്രയുമ്മ വയ്ക്കും 
ആരതിന്റെ കണക്കെടുക്കും ആധി

മടുക്കും വരെ നമുക്ക് മിണ്ടാതിരിക്കാം

 1. തണുത്തുറഞ്ഞ കടലില്‍  പൊങ്ങിക്കിടക്കുന്ന നഗരമായിരുന്നത് വര്ഷം മുഴുവനും എന്നേക്കുമെന്നേ ക്കും  അതങ്ങനെ കിടന്നു ചെവിയോര്‍ത്താല്‍ കേള്‍ക്കാവ...