Sunday, November 4, 2018

കോമാളി

ഞാനൊരൂ തൂവാലയാണ്
കരച്ചിലും ദേഷ്യവും 
കുറ്റവും വിധിയും 
ഏല്‍ക്കുന്ന മുഷിഞ്ഞ,
വിയർത്ത തുണ്ട് തുണി

ഞാനൊരു
കാമുകനാണ്
ഒരു ശബ്ദത്തിന്റെ അറ്റത്ത്
ഉണരുകയും ഉറങ്ങുകയും 
ചെയ്യുന്ന ദുര്‍ബലനായ ഒരാള്‍ 

ചിലപ്പോളൊരു തീവണ്ടിയാണ്
പാളം തെറ്റിയിട്ടും 
ഓടിക്കൊണ്ടേയിരിക്കുന്നത്
അടുത്ത സ്റ്റേഷനെത്തുമെന്ന
ആര്‍ത്തിയില്‍ പായുന്നത്

പക്ഷേ ഇതൊന്നുമല്ല 
മുഖത്ത് പല നിറം തേച്ച
കോമാളിയാണ്‌ ശരിക്കും ഞാന്‍ 
വട്ടമെത്തുന്ന ഭീമന്‍ ഗാലറിയിലെ
ഒരേയൊരാള്‍ക്ക് വേണ്ടി
ചിരിക്കുന്ന, സൈക്കിളോടിക്കുന്ന, 
ആയത്തിലൂഞ്ഞാലില്‍ നിന്ന്
താഴെ വീഴുന്ന കോമാളി

കളി കഴിയുമ്പോള്‍ 
ചായമുരിക്കുമ്പോള്‍  
തണുത്ത വിരലാല്‍ 
മുറിഞ്ഞ് പോകുമാഴത്തില്‍ 
നീ തൊടുമെന്നും 
ബാക്കിയാവുന്ന ഉയിരിന്റെ 
പകര്‍പ്പില്‍ നിന്റെ
വിരലടയാളം പതിയുമെന്നും 
ഓര്‍ത്തിങ്ങനെ
കണ്ണടച്ചിരിക്കുന്നൊരാൾ

അപ്പോള്‍ ഞാനും നീയും 
ചേര്‍ന്ന് ഒരു കുമിളയാകും 
എന്നിട്ട് പൊട്ടിപ്പോവുമ്പൊള്‍ 
പിടക്കുന്ന ചെതുമ്പലുകള്‍ 
നിറഞ്ഞ രണ്ട് മീനുകളായി 
നമ്മള്‍ നമ്മളെ 
ജലത്തിനും ഭൂമിക്കും 
പരിചയപ്പെടുത്തി കൊടുക്കും
ചിര(അ)പരിചിതരായ
രണ്ടോർമ്മകളെ.

വര

പ്രണയം തീരുന്നത്
ഒരു നീണ്ട മുറിവുമായാണ്
പിന്നെയാ വര മായ്കാന്‍
അതിലും വലിയ വര
അതു മായ്ക്കാന്‍
അതിലും വലുത്

വരകളിങ്ങനെ
നമ്മളില്‍ പ്രണയമായി
വരവ് പോക്ക് നടത്തുന്നു
അടച്ചിട്ട വാതിലില്‍
അക്ഷമനായ
സന്ദര്‍ശകനെ പോലെ
കോളിങ്ങ് ബെല്ല്
അമര്‍ത്തിപിടിക്കുന്നു

Saturday, November 3, 2018

"മിസ്സ് യു"

മലയാളത്തിലേക്ക് 
അത്രയൊന്നും 
എളുപ്പത്തില്‍ 
വിവര്‍ത്തനം 
ചെയ്യാന്‍ കഴിയാത്ത
ഒരു വാക്ക്
"മിസ്സ് യു"
എന്ന് ഞാനവളോട് 
പറയുന്നു
ഹിമാലയത്തിനു മേലേ
വച്ച് ഓക്സിജന്‍ തീര്‍ന്ന്
പോയ പര്‍വ്വതാരോഹകന്‍ 
വായുവിനു നിലവിളിക്കും പോലെ
ആ വാക്ക് ആകാശത്തിനു കീഴേ
മേഘങ്ങള്‍ക്കിടയില്‍ അഴിഞ്ഞു പോയി 

Friday, November 2, 2018

തര്‍ക്കൊലൈ

നമുക്ക് ഏറ്റവും പ്രിയമുള്ളൊരാളുടെ
കൈ വിരല്‍ ആള്‍ക്കൂട്ടത്തില്‍ 
വിട്ടിട്ടുണ്ടോ 
ഏറ്റവും പ്രിയമുള്ളൊരാളുടെ
പിന്നില്‍ നിന്ന് അത്രയുമാഴത്തില്‍ 
ഒരു കഠാര കുത്തി ഇറക്കിയിട്ടുണ്ടോ
അത്ര ചേര്‍ത്ത് നിര്‍ത്തി 
പോയന്റ് ബ്ലാങ്കില്‍ 
നിറയൊഴിച്ചിട്ടുണ്ടോ
അപ്പോള്‍ എവിടെ നിന്നുമല്ലാതെ
കണ്ണുകളില്‍ നിന്ന് ഇലയും 
ചെടികളും മുളയ്ക്കുന്നത്
കണ്ടിട്ടുണ്ടോ
ഒരു നിശ്ശബ്ദതയിങ്ങനെ കനപ്പെട്ടു 
നനഞ്ഞ ചിറകായി മാറുന്നത് കണ്ടിട്ടുണ്ടോ
ഇതൊന്നും കണ്ടിട്ടില്ല എങ്കിലും 
അതില്‍ നിന്നും കൊഴിയുന്ന
ഒരൊറ്റ തൂവല്‍ ഭൂമി തൊടാതെ
ആകാശത്തേക്ക് മാത്രം 
ഊയലാടി പറക്കുന്നത് 
കണ്ടിട്ടുണ്ടോ
തീ പോലെ പൊള്ളുന്ന 
പ്രണയത്തില്‍ നിങ്ങള്‍ 
ഒരിക്കലെങ്കിലും 
തൊലിയടര്‍ന്നിട്ടുണ്ടെങ്കില്‍ മാത്രം 
അപ്പോള്‍ മാത്രം 
നിങ്ങള്‍ അത് കാണും 










Friday, October 19, 2018

സത്യത്തില്‍ ഇതൊന്നുമല്ല

അത്രയ്ക്കും സ്നേഹിക്കാന്‍ 
മുട്ടുമ്പൊള്‍ പറന്ന് പോവാന്‍ 
നമ്മളുണ്ടാക്കിയ 
വിമാനത്തിനു എന്ത് 
നിറം തേക്കും ?
കേറി ഇരുന്നാലുടനെ
അമ്പ് പായും പോലെ 
മാനത്തേക്ക് പായണം 
തലകുത്തനേ ഭൂമിയിലേക്ക്
വളരുന്ന ആ മരത്തിലെ
പൂവ് പൊട്ടിക്കണം 
അതു നീ തന്നെ പൊട്ടിക്കണം 
പാഞ്ഞു പോകുമ്പൊള്‍ 
കൈ നീര്‍ത്തി ഒരൊറ്റ..

ഒന്നല്ല ഒരഞ്ചാറ്
തൂവാലകള്‍ എടുക്കണം 
മറക്കാതെ
ഓരോന്നിനും നിന്റെ മണം നിറക്കണം 
എഴുന്നേറ്റ് വരുമ്പോളുള്ള മണം 
കുളി കഴിയുമ്പോള്‍ ഉള്ളത്
ഉച്ചക്കുള്ള മണം 
ക്ഷീണിച്ച തളര്‍ന്ന വൈകുന്നേരത്തിന്റെ
ഉറങ്ങുമ്പൊളുള്ള മണം 
നീ ഇല്ലാതിരിക്കുമ്പോള്‍ 
എനിക്കുറങ്ങണ്ടേ..

സത്യത്തില്‍ ഇതൊന്നുമല്ല
നിന്നോട് മിണ്ടാന്‍ ഒരു 
ഭാഷയാണ്‌ ഏറ്റോം അത്യാവശ്യം 
നിന്നെ മിസ്സ് ചെയ്യുന്നു എന്ന് പറയാന്‍ 
ഒരു വാക്ക് 
ഇപ്പോ കാണണമെന്ന് ന്ന് പറയാന്‍ 
മറ്റൊരു വാക്ക്
ദേഷ്യം വരുന്ന് ന്ന് പറയാനൊന്ന്
പൊസ്സാസ്സീവ്‌നെസ്സ് മൂക്കുമ്പോ
അത് പറയാന്‍ ഈഗോ സമ്മതിക്കാതെ 
ഇരിക്കുമ്പൊ വേറെ ഒരെണ്ണം 
ചെലപ്പോഴൊക്കെ നീയില്ലാതെ
ജീവിക്കാന്‍ വയ്യെന്ന്‌ തോന്നും 
അപ്പോ പറയാന്‍ ഒന്നു കൂടെ,
ആ ഒരൊറ്റ വാക്കിലുണ്ടാവണം 
ഒരായിരം വാക്കുകള്‍ 

എത്ര ചങ്കുരുകി പറഞ്ഞാലും 
ഞാനിതൊക്കെ എത്ര 
കേട്ടിരിക്കുന്നു എന്നും 'പറഞ്ഞുള്ള
നിന്റെ ഇരിപ്പുണ്ടല്ലോ
അതൊന്ന് ഫോട്ടോയെടുത്ത്
ഫ്രെയിം ചെയ്യിക്കണം 

ന്റെ ഉള്ളി കേറി നോക്കാന്‍ 
നിനക്കൊരു തുരങ്കം 
പണിഞ്ഞ് തരണം 
നിനക്ക് മാത്രം 
നിന്റെ വിരല്‍തുമ്പ്
പതിഞ്ഞാല്‍ മാത്രം 
തുറക്കുന്ന 
വാതിലൊന്ന് വേണം അതിനു
അതിലൂടെ നടന്ന്  നടന്ന് വരുമ്പൊള്‍ 
നീയേ എന്ന് മിടിക്കുന്ന
ഹൃദയത്തില്‍ നിന്ന് രക്തം 
കയറ്റി പോകുന്ന വണ്ടികള്‍ 
കാണും 
ഇതെന്ത് മൈരു സ്നേഹമെന്ന്
നീ അന്തം വിടണം 
അപ്പോള്‍ അപ്പോള്‍ മാത്രം 
ഹാ ഇതാണ്
ഇത്രയുമുണ്ട് എനിക്ക് നിന്നോട്
എന്നേക്കാളേറേയെന്ന് 
നെഞ്ചും വിരിച്ചൊരു നില്‍പ്പുണ്ട് ഞാന്‍ 
ഒന്നു തിരിഞ്ഞു മറിഞ്ഞാല്‍ 
നിന്നെ ഒരാള്‍ക്കും ഒന്നിനും 
വിട്ടു കൊടുക്കില്ലെന്ന് പറഞ്ഞ്

മ്മ

അടുത്തേക്ക് വന്നാല്‍
മുരള്‍ച്ചയോടെ
മുഖം കൂര്‍പ്പിക്കുന്ന
കാട്ടു മൃഗത്തിനെ
പോലെയാണു നീ
വെയില്‍
മുഖത്ത് വീണാല്‍
വെയിലിനോടും
കയര്‍ക്കുന്നവള്‍
ചിരി മറക്കാത്ത
വിരല്‍ തുമ്പുകളോടും
കൂടും .. കൊത്ത്
ഉള്ളിലുള്ളത്
കാണിക്കുന്ന
കണ്ണിനെയെന്ത് ചെയ്യും
ഇറുക്കി അടക്കുകയല്ലാതെ
ഒന്നെത്തി നോക്കി
തിരികെ ഇരുട്ടിലേക്ക്
കയറുന്ന വന്യജീവി
അടക്കാന്‍ പറ്റാതെ
ആവുമ്പോള്‍
ഒരു കടുക് മണിയുടെ
അത്രത്തോളം മാത്രം
പുറത്ത് വരുന്ന
ആ.. അതുണ്ടല്ലോ
ഒരു മിനുക്കവുമില്ലാത്ത
ആ ഒരു വാക്കിന്റെ
പാതി,
അത്രയും പാതിയില്‍
അത്രയും മുഴുവനുമായ
ഒരു വാക്ക് ഞാന്‍ കേട്ടിട്ടേയില്ല




Sunday, October 14, 2018

ഹൃദയം ഏത് രാജ്യമാണ്‌ അല്ലെങ്കിലേത് ദ്വീപ്

എങ്ങോട്ടും പോകാനില്ലായിരുന്നു
അല്ലെങ്കില്‍ തന്നെ അത്രയും 
ചെറിയ നഗരത്തില്‍ എത്ര
ദൂരം പോകാനാണ്
പോയ വഴികളുലൂടെ അങ്ങുമിങ്ങും 
പിന്നെയും പിന്നെയും 
മടുത്തപ്പോള്‍ ഒരു കോഫിഷോപ്പ്
അതിന്റെ ഒന്നാം നില
വെയില്‍ വീഴുന്ന ചില്ലിനരികെ
ഫോട്ടൊ എടുക്കാനുള്ള വിഫലശ്രമങ്ങള്‍ 
അവിടെ നിന്നുമിറങ്ങി
നമ്മള്‍ ആദ്യം കണ്ട വഴിയേ
പോകുന്നു
എതോ കുന്നിന്റെ 
മുകളില്‍ നിന്ന്
താഴേക്ക് ഓടി പോന്ന
പുഴ പോലെ ഉണ്ടായിരുന്നു 
ആ വഴി
വിജനം പക്ഷേ മരങ്ങള്‍ 

ഒരാള്‍ അയാള്‍ക്ക് സാധ്യമാവുന്ന
അത്രയും ഉമ്മ
മറ്റൊരാളെ വക്കുന്നതെപ്പോഴാണ്
ഓടിക്കൊണ്ടിരിക്കുന്ന കാര്‍ 
രണ്ട് പേര്‍ മാത്രമുള്ള ദ്വീപാണ്
നമുക്ക് ഒരു പരിചയവും 
ഇല്ലാത്ത ഇടം 
അങ്ങോട്ട് പോയ വഴി
മറന്ന് പോവുന്നത്രയും 
ഉമ്മ വയ്ക്കുന്നു
ഒന്നും പറയാത്ത ഉമ്മ

വെയിലില്‍ പല തുള്ളികളായി 
മഴ പെയ്തു. 
കുന്നിന്റെ മുകളില്‍ 
ചിലപ്പോള്‍ ഇതില്‍ കൂടൂതല്‍ 
മഴ പെയ്യുന്നുണ്ടാവുമെന്ന് നീ പറഞ്ഞു
മഴയില്‍ കാഴ്ച മറഞ്ഞിട്ടും 
വൈപ്പര്‍ നമ്മള്‍ 
ഓണ്‍ ചെയ്യുന്നേയില്ല.

ഉന്മാദങ്ങളെ കെട്ടഴിച്ചു
വിടുന്ന എന്തോ ഒരു മണം 
ദ്വീപില്‍ നിറഞ്ഞിരുന്നു
പൊടുന്നനെ വഴി തീരുകയും 
ഒരു ടി ജക്ഷനില്‍ നിന്ന്
ഇടത് വശം തിരിഞ്ഞ്
നഗരത്തിലേക്ക് 
പോവുകയും ചെയ്തു

നമ്മളപ്പോള്‍ ഒന്നും പറയാത്ത
ഉമ്മകളെ കൈമാറുകയായിരുന്നു
എന്തിനാണ്‌ ഉമ്മ വച്ചതെന്ന് ചോദ്യത്തിനു
ഞാനെന്ത് പറയാനാണ്
തിരികെ വരുമ്പൊള്‍ ഏറെക്കാലമായി
മറന്ന് പോയൊരു പാട്ട്
ആവര്‍ത്തിച്ച ഫോര്‍വേര്‍ഡില്‍ 
വന്നു വീണു

i love you, 

but you're not mine.♪♫♬♪♫♬♪♫♬

മടുക്കും വരെ നമുക്ക് മിണ്ടാതിരിക്കാം

 1. തണുത്തുറഞ്ഞ കടലില്‍  പൊങ്ങിക്കിടക്കുന്ന നഗരമായിരുന്നത് വര്ഷം മുഴുവനും എന്നേക്കുമെന്നേ ക്കും  അതങ്ങനെ കിടന്നു ചെവിയോര്‍ത്താല്‍ കേള്‍ക്കാവ...