Tuesday, September 3, 2019

പൂച്ച

എന്റെ പൂച്ചയുടെ പേര്
പിപ്പി എന്നാണ്
രാത്രി ഉറങ്ങുന്നതിനു മുന്നേ
അവളെ കാണാതാവും പലവട്ടം
ഏതെങ്കിലും പുല്ലിന്റെ ഇടയില്‍
നാലു കാലും പൊക്കി സ്വപ്നം കാണൂന്ന
ഉറക്കത്തില്‍ അവളെ
എവിടെ നിന്നെങ്കിലും കണ്ട് പിടിക്കും
എത്ര വഴക്ക് പറഞ്ഞാലും
ഇതൊക്കെയെന്ത് എന്ന മട്ടില്‍ നോക്കും

എവിടെ നിന്നെങ്കിലും കിട്ടിയ
ഒരു കഷണം പേപ്പറില്‍
പാതി കളിപ്പാട്ടത്തില്‍
കെട്ടി മറിയുന്നുണ്ടാവും
ചിലപ്പോള്‍
വിളിച്ചു നടക്കുമ്പോള്‍ ഒന്നുമറിയാത്ത മട്ടില്‍
ഇരിക്കുന്നുണ്ടാവും
ശ്വാസമെടുക്കുന്ന ശബ്ദം മാത്രമാവും
കേള്‍ക്കുക

നിന്നെയും പൂച്ചയേയും എങ്ങനെ കൂട്ടി കെട്ടും
എന്നതാണ്..
കാരണം നിന്നെയോര്‍ത്ത് എഴുതി തുടങ്ങിയതാണ്
ആ ഓര്‍മ്മ വന്നു...
നഖങ്ങള്‍ .. മൂര്‍ച്ച ഏറെയാണ്
മറ്റു ചിലപ്പോള്‍ നിന്ന നില്‍പ്പില്‍
കാണാതെയാവും
ഏറേക്കുറെ പോയി, ഇനി കാണില്ല
എന്നോര്‍ക്കുമ്പോ തിരികെ വരും
ഓര്‍മ്മ ഇല്ലെന്നൊക്കെ പറയും
പക്ഷേ ഏറെയാണോര്‍മ്മ

എത്ര നാടുകടത്തിയാലും
തിരികെ വരും ..
ഇപ്പോള്‍ ശരിയായില്ലേ..
അവസാന വരി
അവസാന വാക്ക്

Friday, August 30, 2019

ഓര്‍മ്മയുണ്ടോ..

ഓര്‍മ്മയുണ്ടോ..
ഓര്‍മ്മയില്ലേ
ഒട്ടുമില്ലേ..
ഒട്ടും ?
ഇച്ചിരി ?
കടുകു മണിയുടെ അത്രേം ?

ഉമ്മ വയ്ക്കാന്‍ പറ്റാഞ്ഞിട്ട്
വിരല്‍ കോര്‍ത്ത് ഉമ്മ വച്ചത്
വേഗത്തില്‍ പതുക്കെ
നീളത്തില്‍ , ഏറേ നേരം
തൊട്ടു നിന്നത്

ഒഴിഞ്ഞ വഴികള്‍ കാത്ത് നിന്നത്
കവിളിലേക്ക് എത്തുന്ന
ഉമ്മകള്‍ ചുണ്ടിലാക്കിയത്
നനച്ചുമ്മ വച്ചത്

അസൂയയും കുശുമ്പുമില്ലാത്ത
രണ്ട് പേര്‍ നമ്മള്‍
നിനക്ക് ഞാന്‍ പ്രേമിച്ചാലെന്ത്
എനിക്ക് നീ പ്രേമിച്ചാലെന്ത്
നമുക്കാരേയും പ്രേമിക്കാം

നമ്മള്‍ എപ്പോഴോ വന്നു പോകുന്ന
രണ്ട് ഋതുക്കള്‍
ഒരിക്കല്‍ പൂത്തത് പോലെ
പിന്നെ പൂക്കാത്തവര്‍

ചിലപ്പോൾ പ്രണയം ഒന്നിനുമല്ലത്ത ഭാഷണമാണ്
ഒരിക്കലും മനസിലാവാത്ത ജ്യാമിതിയിലെ സമവാക്യം
ചിലപ്പോൾ പ്രണയം
കൃത്യമായി പ്ലാൻ അനുസരിച്ച്
ഒരു വരയില്‍  നീങ്ങുന്ന ഉറുമ്പ്
ഇടയ്ക്കിടെ മാത്രം തിളങ്ങുന്ന
ഒരു നക്ഷത്രത്തെ കാണുന്ന ഒരാള്‍
തകർന്ന ഹൃദയങ്ങളുടെ സൈന്യത്തെ നയിക്കാൻ
സമയമില്ലാത്ത ഒരു മാലാഖയോട് പ്രാർത്ഥിക്കുന്നവനുമാണ്


അതേസമയം അത് അടിസ്ഥാനരഹിതവും
സത്യസന്ധവുമാണ്,
അത് എന്നെന്നേക്കുമായി
ഇല്ലാതായേക്കാവുന്ന
ആകാശത്തെ ഉദ്ദേശിച്ചുള്ളതാണ്.
ചിലപ്പോൾ പ്രണയം അസംഭവ്യമായ കാര്യങ്ങളുടെ ഒരു പട്ടികയാണ്
നിങ്ങളെ ശരിക്കും എന്താണെന്ന് മറയ്ക്കാൻ
നിങ്ങൾ മാസ്ക് ധരിക്കുന്നതുപോലെ
നിങ്ങളുടെ തുറന്ന മുറിവ് തുന്നിക്കെട്ടാന്‍
ഒരിക്കലും മരവിപ്പിച്ചിട്ടില്ല
എന്തൊരു വേദന ആയിരുന്നിരിക്കണമത്
പച്ച ഇറച്ചിയില്‍ സൂചിയിങ്ങനെ കയറിയിറങ്ങുന്നത്
ആവര്‍ത്തിചുമ്മ വയ്ക്കുന്ന പോലെ
ഇത് ലളിതമാണ്, ഞാൻ
ചോദിക്കുന്നത് അത്രയേയുള്ളൂ
നമ്മുടെ മുറിയിലെ
എഴുതാത്ത ആത്മഹത്യാക്കുറിപ്പുകൾ
അതെനിക്ക് തിരികെ വേണം

നമ്മള്‍ ട്രാഫിക് ജാമിൽ കുടുങ്ങിയത് ഓര്‍ക്കുന്നോ
നമ്മളപ്പോള്‍ വെയിലിനെ കുറിച്ചും മഴയെക്കുറിച്ചും
പിന്നെ നിന്റെ വിരലുകളെ കുറിച്ചും
സംസാരിച്ചു
അപരിചിതമായ കഥകള്‍ പറഞ്ഞു
നമ്മുടെ കോഫീ ഷോപ്പ്
ആരും കാണാതെ നമ്മള്‍ കൈ പിടിച്ച്
ഒറ്റക്കാല്‍ നൃത്തം ചെയ്തു
പരിചിതമല്ലാത്ത ഒരു ചിത്രം വരഞ്ഞ
നമ്മുടെ കാപ്പി, അതിന്റെ ചവര്‍പ്പ്
പ്രണയമേയെന്ന് നിന്നെ വിളിക്കുന്നില്ല
എന്നേയുള്ളു..
ആ ചവര്‍പ്പാണ്‌ നീ

നീ കൊത്തു കൂടുന്ന രീതി ഞാൻ മിക്കവാറും മറന്നു ..
എന്നോട് ക്ഷമിക്കൂ;
അല്ലെങ്കിൽ എനിക്ക് പ്രാന്താകുമ്പോൾ
അത് കാണിക്കാതിരിക്കാൻ തിരഞ്ഞെടുക്കുക
നമ്മുടെ ആ ഇടമാവും
അല്ലെങ്കിൽ എന്റെ വിരലുകൾ നിനക്കും ദൈവത്തിനും
ഇടയിലുള്ള നമ്മുടെ ഇടങ്ങള്‍ മാത്രം എങ്ങനെ കണ്ടെത്തുന്നു
ദൈവമേ, എനിക്ക് അവ നഷ്ടമാകുമോ?

എനിക്ക് ഇനി എന്റെ ഓര്‍മ്മ തിരികെ ആവശ്യമില്ല
എന്റെ ഓര്‍മ്മകള്‍ സൂക്ഷിക്കുന്ന
നിന്റെ തലച്ചോറില്‍ ഞാനൊരു
ഗ്രനേഡ് വച്ചിട്ടുണ്ട്
പിന്‍ ഊരിയത്
അതിപ്പോ പൊട്ടും

ഇനി ഒരിടത്തും, ഒരിടത്തും ഞങ്ങൾ കണ്ടുമുട്ടില്ല
ഞങ്ങൾക്ക് മാത്രം അറിയാവുന്ന ഒരിടം
ഒരു രഹസ്യ റൂട്ട് ഉപയോഗിച്ച്
നമ്മള്‍ പോയിരുന്ന ആ ഇടം ഇപ്പോഴില്ല
ഒരിടത്തും നമ്മള്‍ കണ്ടുമുട്ടില്ല
നമ്മൾ സൂര്യകാന്തി വിത്തുകൾ വിതറിയ ഒരിടം ഇപ്പൊൾ  പൂത്തിരിക്കുന്നു

വെയില്‍ വന്ന് വീഴുമ്പോള്‍
ചിലപ്പോള്‍ ..
എപ്പോഴുമല്ല
ചിലപ്പോള്‍ ..
ഒരു കീറു വെയില്‍ വന്ന്
വീശുമ്പോള്‍ നിന്നെയോര്‍മ്മ വരും
മിന്നലില്‍ തെളിയുന്ന വീടോര്‍മ്മ പോലെ..
തിരിഞ്ഞു നടക്കും ..
അല്ലാതെന്ത്...

Wednesday, August 21, 2019

"അബ്രകഡബ്ര"




ഞാൻ ഒരു മാന്ത്രികനാകുന്നു,
നിന്നോടൊപ്പമുള്ളപ്പോള്‍ മാത്രം
വസന്തമാണോ നീ ?

41-ലധികം ഭ്രാന്തൻ ഉന്മാദങ്ങള്‍
പരുക്കേറ്റ ഒരു എയ്ത്തു നക്ഷത്രം
ഇക്കാറസ് പറന്ന സൂര്യാകാശം
ഉരുകിയ മെഴുകു ചിറകുകള്‍
നിലം പൊത്തിയ ഒരു പൊള്ള മരം
അഴുക്ക് പന്നിക്കൂട്ടം, അവിടെ ഒറ്റക്കൊരു കാക്ക
കാഞ്ഞിരത്തിന്റെ ഉണക്കിലകള്‍
പൊതിഞ്ഞ് ഒരു അവധിക്കാല വീട്
കടലും , ലൈഫ് ഗാര്‍ഡും നീയാണ്

നിന്റെ ഹൃദയമിടിപ്പിന്റെ
കഷണങ്ങള്‍ കുക്കീബിസ്‌കറ്റുകള്‍
എറ്റവും അറ്റത്തെ തുന്നല്‍ നൂല്‍ വിട്ട ഉടുപ്പ്
18 ഡിഗ്രീ സെല്‍ഷ്യസ് നും താഴെ തണുപ്പ്
കാലറ്റം എത്താത്ത പുതപ്പ്
മഞ്ഞ് പ്രഖ്യാപിച്ച കര്‍ഫ്യൂ
വസ്ത്രവും ശവങ്ങളും
നമ്മുടെ മുറിവുള്ള ആത്മാക്കൾ
ഇടിഞ്ഞ് വീഴാറായ മതിലിനരികില്‍
ഒളിച്ചു നിന്ന് നമ്മളൊരു
ചുംബനം ലൂപ്പിലേക്കിടുന്നു
ദൂരെ ഒരു കവണയിലെ കല്ല്
എന്റെയും നിന്റെയും
തലയിലേക്കാരോ
ഉന്നം പിടിക്കുന്നു
വഴി തെറ്റിയ പൂച്ചകള്‍ വാതിലില്‍
അമര്‍ത്തി മാന്തുന്നു
രണ്ട് ഋതുക്കളുടെ ഇടയില്‍
അതിസന്തോഷം തേടുന്ന
ദേശാടന മൃഗങ്ങൾ മാത്രമാണ് നമ്മള്‍

നമ്മുടെ വിശുദ്ധ നക്ഷത്രം
മരുഭൂമിയിലെ നിഴൽ മേലാടകള്‍
കാറ്റ് വിരിപ്പുകള്‍
ഭയം നിറഞ്ഞ ഉഷ്ണക്കാറ്റ്,
മുറിച്ചു കടന്നു പോകുന്ന
ഉരുക്ക് റെയിലുകൾ,
വെയിലിന്റെ കീറുകള്‍ ,
തിളങ്ങുന്ന നദിയുടെ
ആഴത്തിലേക്ക്
ദാഹത്തിന്റെ
അധിനിവേശം.

ഉപ്പുവെള്ളം, ഒലിവ് കായ്കള്‍
യവം, ഗോതമ്പ്
ചെറുനാരങ്ങകൾ,
നിന്റെ മൂക്ക്, ചെവി
കവിളുകളും
മുഖവും വിരലുകളും
കണ്ണുകളുടെ പച്ച നിറം
നിറമില്ലാത്തതും
വിളറിയതുമായ നമ്മുടെ ഫോട്ടോ,
കനത്ത രജായി
ഓർമ്മകളെ മറികടക്കാൻ;
മൃതദേഹമില്ലാതെ ശവപ്പെട്ടി.

തെരുവുകളില്‍ കീറിപ്പറിഞ്ഞ
പെണ്ണുങ്ങള്‍
ഐസിയുവിലാണെന്നപോലെ
അവളെ  വെറുതെ വിടുക
വിശ്രമിക്കാൻ മൗനം ആവശ്യമാണ്

ചില ദിവസങ്ങളിൽ ഞാൻ സമരം ചെയ്യുന്നു.
ചില ദിവസങ്ങൾ  എന്റെ ഉറക്കത്തിൽ
ഞാൻ മുങ്ങിത്താഴുന്നു
വിടവാങ്ങൽ എന്നെ മാറ്റിമറിക്കും
പക്ഷേ.. എനിക്ക് ഒരു ആലിംഗനം വേണം,
അതി കഠിനമായ ഒന്ന്
അത്ര നീളത്തില്‍
നമ്മള്‍ക്ക് കടക്കുവാനുള്ള ഒരു പാലമുണ്ട്

ഞാന്‍ കൈകള്‍ തുറന്നു കാട്ടുന്നു
ശൂന്യം
ഒരു ചിത്രശലഭം, പ്രാവ്,ഒരു പൂച്ചെണ്ട്
ഒരു പെണ്‍കുട്ടിയുടെ മുടിയിതള്‍


"അബ്രകഡബ്ര"

കാണാതാവുന്നു

"അബ്രകഡബ്ര"

തിരികെ വരുന്നു

നാലു മണി പതിനേഴുമിനിട്ട്‌ നാലു സെക്കന്റ്‌.
പിന്‍ ഊരിയ ആ ബോംബ് ഇപ്പോള്‍
പൊട്ടി തെറിക്കും

ഓടണോ ഒന്നിച്ചിരിക്കണോ
നമുക്ക് ​ഒന്നിച്ച് കെട്ടിപിടിച്ചിരുന്നാലോ
ചിതറുമ്പോള്‍ കൈ അരികില്‍
കാല്‍ അരികില്‍ കണ്ണ്‌ അരികില്‍
ശിരസ്സ് അരികില്‍
ഹാ...
നമുക്ക് അങ്ങനെ മരിച്ച് പോയി
കൊണ്ടേ ഇരിക്കാം

Saturday, August 17, 2019

മറന്നൂ.................

तुम्हें कोई और देखे, तो जलता है दिल
बड़ी मुश्किलों से फिर, सम्भलता है दिल
क्या क्या जतन करतें हैं, तुम्हें क्या पता


മറന്നൂ നിനക്ക് ഹിന്ദി അറിയില്ലല്ലോ..
പ്രിയേ .. സംഭവം എന്താണെന്ന് വച്ചാല്‍
നിന്നെ വേരെ വല്ലവനും വായ് നോക്കിയാല്‍,
പ്രേമിച്ചാല്‍, നീ അവനോട് കിന്നാരം പറഞ്ഞാല്‍
എനിക്ക് ഒടുക്കത്തെ അസൂയയും ദേഷ്യവും
വരുമെന്ന്.. അത്രയ്ക്ക് കഷ്ടപെട്ട് ബുദ്ധിമുട്ടി
ഞാനത് നിന്നെ കാണിക്കാതെ നോക്കുമെന്ന്
ഈ ഗോസായിമാരൊക്കെ അത് നേരത്തെ
കണ്ടൂപിടിച്ചേക്കുന്നു..
.
എന്താല്ലേ

സത്യത്തില്‍ വര്‍ക്കല ക്ലിഫ്ഫില്‍ നിന്ന്
നേരെ കടലിലേക്ക് എടുത്ത് ചാടും പോലെയാണ്
നിന്നെ പ്രേമിക്കുന്നത്
കടലില്‍ എത്തിയാല്‍ എത്തി
നീലജലാശയത്തില്‍ മുങ്ങിപൊങ്ങി
തുടിക്കും എന്നൊന്നുമല്ലടോ
ഒന്നു മുങ്ങിപൊങ്ങുമ്പോള്‍
നിന്റെ മുഖം കാണൂമെന്നും
തണുത്ത ഒരുമ്മ വയ്ക്കാമെന്നുമൊക്കെ
ആവും ഉള്ളില്‍


ഒരാള്‍ക്ക് മനസിലാവുന്നതും
എതിരേ നില്‍ക്കുന്നയാള്‍ക്ക്
മനസിലാവാത്തതും ആയ
പ്രണയം ചൈനീസ് ഭാഷ പോലെയാണ്
ചോരയെടുത്ത് പെയിന്റ് ചെയ്യുന്നവനോട്
നല്ല കളര്‍ ഏതാ ബ്രാന്റ് എന്ന്
ചോദിക്കുന്ന പോലാവും


സത്യത്തില്‍ പ്രണയം യുഗാന്തരങ്ങളോളം
അത് തന്നെയായിരുന്നു
ലോകത്തിലെ ഏറ്റവും വലിയ
കാമുകന്‍  അവനു മാത്ര അറിയുന്ന
ഭാഷ സംസാരിക്കുന്നവന്‍ ആയിരുന്നു
പാവം
അയാല്‍ 21ആം നൂറ്റാണ്ടില്‍ 18ആം
നൂറ്റാണ്ടിലെ ജീവിതം ജീവിച്ചു
എപ്പോഴും ഒറ്റേ വിഷയത്തില്‍
പൂജ്യം മാര്‍ക്ക് വാങ്ങി

ഓട്ടമല്‍സരം പോലെയല്ല
പ്രണയത്തില്‍ തോറ്റവരാണ്
ജയിച്ചവര്‍
ഉടലില്‍ കുടുങ്ങിയ
ഒരാളുടെ മണത്തെ
തൂത്തെറിയാന്‍ കഴിയാതെ പോയവരാണ്
അവര്‍
പായ്‌മരം തകര്‍ന്നു
ആഴങ്ങളില്‍ പോയവരാണവര്‍

ഓര്‍മ്മ വൈകുന്നേരം
പറന്ന് പോകുന്ന കിളികളാണ്
എവിടെ ചേക്കേറുന്നുവെന്ന
നാമറിയുന്നില്ല


നീ കടലെങ്കില്‍ ഇടിച്ചു
തകര്‍ന്ന് ഒഴുകി പരക്കുന്ന
എണ്ണയാണെന്റെ പ്രണയം
ഹ ഹ
അടിപൊളി ഉപമയെന്നല്ലേ
അറിയാം


നിന്റെ കാവല്‍ക്കാരായ മുള്ളുകള്‍ക്ക്
കൈക്കൂലി കൊടുത്ത്
തോട്ടത്തില്‍ കടന്നതാണ്‌ ഞാന്‍
എനിക്ക് എപ്പോഴും നിന്നിലേക്കുള്ള
വഴി അറിയാമായിരുന്നു
എന്നെങ്കിലും


വാക്കുകള്‍ക്ക് അതിന്റെ
വഴി തെറ്റുമ്പൊള്‍
തിരികെ പോ
ഇതല്ല വഴി എന്ന് പറയാനുള്ള
മാര്‍ഗ്ഗമായിരുന്നു എനിക്ക്
ഉമ്മ വയ്കുക എന്നത്
ഞാനത് എപ്പോഴും ചെയ്തിരുന്നു


മെഴുതിരി മാത്രമല്ല
ഉരുകിയൊലിക്കുമ്പോള്‍
കത്തി തീരുമ്പോള്‍
ഒന്നും അവശേഷിപ്പിക്കാത്തത്


ഏറ്റവും എളുപ്പത്തില്‍ പറഞ്ഞാല്‍
ഇത് പോലെയാണ്
ഞാന്‍
പ്രണയത്തില്‍
ആരുമായി?
നീയുമായി!


ഉമ്മ വച്ച് കഴിയുമ്പൊള്‍
രണ്ട് ചുണ്ടുകള്‍ക്കിടയില്‍
ബാക്കിയാവുന്ന
മൌനത്തെ പ്രണയമെന്ന്
വിളിക്കുന്നുവെങ്കില്‍
അതുമാണത്
പ്രണയം

Tuesday, August 13, 2019

ഒറ്റ!

ദിവസ വാടകയ്ക്ക്    
മുറിവില്‍ നിന്ന് 
മുറി എടുക്കുന്ന 
പോലെ
ഒറ്റ് എന്ന വാക്കില്‍ നിന്ന്
ചന്ദ്രക്കലകിഴിച്ചാല്‍ 
കിട്ടുന്ന വാക്ക് 

ഒറ്റ!

ഉയിരിന്നാഴം 

ശരിക്കുമേതാണ്
മരണമെന്നോര്‍ത്തിരിക്കുന്ന
ഒരാളോടാണ്

കൂടെയുള്ളവരെല്ലാം മരിച്ച്
ഒരാള്‍ മാത്രം രക്ഷപ്പെടുന്ന
അപകടങ്ങളുണ്ട്
ഒരു നൊടിയിടയില്‍ 
ബോധം പോവുന്നതിനു മുന്നേ
അയാള്‍ കണ്ടിരിക്കും 
വളവ് 
നേറെ വരുന്നൊരു വണ്ടി
ഉറക്കത്തില്‍ നിന്ന്
അലര്‍ച്ചയിലേക്ക്
ഉണര്‍ന്ന ഉറ്റവരെ

മുഖം കഴുകുമ്പൊള്‍
തൊടുമ്പോള്‍
അയാളുടെ തന്നെ ഓര്‍മ്മകള്‍
അയാളുടെ തന്നെ ആഴങ്ങളിലേക്ക്
കുത്തിയിറങ്ങിക്കൊണ്ടിരുന്നു


ഓര്‍മ്മയിലെ
കൊടും വളവിലാണ്
ഇടിച്ച് തകര്‍ന്ന ആ വണ്ടി
കിടക്കുന്നത്
അവിടെയാണ്
ഒരുറപ്പുമില്ലാതെ
റോഡ് മുറിച്ചു കടക്കാന്‍ 
ഒരു തേരട്ട ഒരുക്കമാവുന്നത്
നമ്മള്‍ നമ്മളില്‍ ചിലരെ
മുറിച്ചു കടക്കാനൊരുമ്പെടും പോലെ

Monday, August 12, 2019

പെരും കടൽ ആകാശം

ഞങ്ങളുടെ മുറി
ഉരുണ്ട് ഉരുണ്ട് നീങ്ങുന്ന
കാറായിരുന്നു
പുഴക്ക് മേലെ കടന്ന്
പോകുമ്പൊള്‍ നീ മുഖം നോക്കുന്നു
കൂട് തുറന്നെന്ന പോലെ
നീ പറക്കുന്നു
ഒരു പെരും കടല്‍ ആകാശത്ത്
പരക്കുന്നത് കണ്ടു
കഴുകന്‍ നോട്ടം കൊണ്ടൊരു
പെരും മീനിനെ കണ്ടൂ

ഉറക്കം വരാത്ത ഒരു രാത്രിക്ക്
മുന്നില്‍ ഉടല്‍ വിറക്കുന്നു
മഴ തോര്‍ന്നിട്ട് വേണം
കുടയെടുക്കാത്ത
വഴിയിലേക്ക് എനിക്ക് പോകാന്‍


ഇനി മരങ്ങളിലേക്ക്
തളിരികളെ തേടിയെത്തുന്ന
കാറ്റേ
നിനക്ക് കിന്നരിക്കാന്‍
ഇലകളില്ല
എല്ലാം കൊഴിഞ്ഞിരിക്കുന്നു
ദര്‍വീഷുകളുടെ നൃത്തം
നിന്നില്‍ ഞാനെന്റെ നെറ്റി മുട്ടിക്കുന്നു
ഞാന്‍ നിന്നിലെ കാട്ടുമൃഗത്തെ
പിന്തുടരുന്നു
നീയായിരുന്നു എന്റെ
ശമനം ...അതിന്റെ മരുന്ന്
ഇരുവഴി പിരിയുന്നതല്ല
കൂടി ചേരുന്നതാണ്
മരണം

എല്ലാ കെട്ടിടങ്ങളും
പൊടിഞ്ഞ് തീര്‍ന്ന
നഗരമാണ്‍ ഞാനും നീയും
ഒരിക്കലും തീരാത്ത
സങ്കടം നീ
നാമെങ്ങനെ കാക്കും
നമ്മുടെ രഹസ്യങ്ങള്‍
നീളെ പൊളിഞ്ഞ
നമ്മുടെ കപ്പല്‍
പൊങ്ങി കിടക്കാന്‍
കടലില്‍ ഇനിയും
ഉപ്പ് കലക്കുന്ന
നാവികനാണ്‌ ഞാന്‍


നമ്മള്‍ ഒരു നാള്‍
പ്രണയത്തില്‍
കത്തി വീഴും
കരികട്ടകള്‍
അന്ന്.. അപ്പോള്‍ ..
നീ കൂടുതല്‍
ഒന്നുമോര്‍ക്കാതെ
എന്നെ നെഞ്ചില്‍ ചേര്‍ക്കും
ഇരട്ടി മിടിക്കുന്നത്
കേള്‍ക്കുന്നുവോയെന്ന് ചോദിക്കും
ഞാനൊന്നും മിണ്ടില്ല..

വെളിച്ചമേ..നിനക്ക്
കടക്കാനൊരു പഴുതുണ്ട്
കടന്ന് വരൂ

മടുക്കും വരെ നമുക്ക് മിണ്ടാതിരിക്കാം

 1. തണുത്തുറഞ്ഞ കടലില്‍  പൊങ്ങിക്കിടക്കുന്ന നഗരമായിരുന്നത് വര്ഷം മുഴുവനും എന്നേക്കുമെന്നേ ക്കും  അതങ്ങനെ കിടന്നു ചെവിയോര്‍ത്താല്‍ കേള്‍ക്കാവ...